Pakay chakar hen matan hen kallakar
(Tekla Fangonon)
Ad namenghan ano ah Kallakar, ammag enag-agaw way ekatnan inanéén, “tomeplag-a ah hangat-o.” Yag no harudhuchun ano inanay, “Nokay hen ayam?” ekatna anowén, “éyà kay lawa manggéggégga-ay.” Ammag homàyat anowén miid paat mepatpatang ah fugta hen lakkana te enanna amin. Ekat ano inanéén, “Nokay lawa hen cha manginhichahichaan Kallakar hen hangatna way ammag an figfigatén inligwatna hen chakar way teneplag yag angkay ta homàyatén miid paat fugtah mehàfa?”
Yachi ano way nappég ah inana, annaat unuchun way mane-em. Yachi yag innilanah Kallakar way enhabrotna hen hangatna yag nanarép. Natchù anon chi harépna wat tomtomana. Ammag hentakon-or hen innarana way gachiw. Yachi ano yag inyapoyna yag annaat utmon. Annaat aran anchi hangatna way Kaman utteng. Ekatna anowén, “Kata pom-at-an kato.” Napanakpak ano hen matana way penom-at anchi fato. Yachi yag cha ano mangamangan. Yachi ano way namin anchi gachiw ya anchi hangatna way chakar, ammag nanchupag way masséy. Ah inana, enseseg-epna hiya hen anchi penget hen wangwang yag ekatna ano ah hamhamànéén , ‘Ay yaha peet hen cha am-ammaan Kallakar ah kawakawakas? Mangamanganén i nanchupag way masséy. Angkay ano nafigat, empegwan inana way mane-em an hiya wat kasenna aphoran hiya way cha mangan.
Yachi yag i innaran inana hen matan Kallakar way nenep-at hen anchi fato yag entongona yag pommanetò way naghéb. Yachi yag ekat ano Kallakarén, ‘Nokay hen nafanichù anchi? Fato ménat.’ Yag chaat ano mangamangan. Angkay yachi ano way enaminna way nangissa hen anchi hentakon-or way gachiw yag enanna amin hen hangatna yag annaat ano ekatén, ‘Kata pom-at-an mata,’ yag maid ano pom-at! Anat ano ekat inanéén, ‘Awahnoha Kallakar.’ Yaha hen tanigno hen chuar. Ay maid chengngarno hen anchi nafanichù? Ekat ano Kallakarén, ‘Pakay hea peetha ina? ‘Umpay, ay miid peet chengngarno hen anchi nafanichù way matam way entongò?’ Yachi ano yag ammag chan kelakela ah Kallakar te amchan chi fafawina yag anggay, a te ammoh lawa mamfangchém hen looh naghéb.? Tàén ano no yachi hen enammaan Kallakar yag naka-asiyan chillu ah inana wat innarana ano hen matan hen ahocha yag eneprégna hen anchi matan Kallakar. Nanepod ano hen hiyachi, iggay ano mantantanig ah Kallakar. Yachi hen lapona no pakay ammag chakar hen matan hen Kallakar.
Anggaychi!
