Hen Nanemheman Juan hen Fégah
(Rosalia Benmaho)
Ané ano cha Juan way hin-ina, miid ano eman mafalincha wat ammag appò kattég hen chacha an-anén. Hen faréycha agé wat fawéy way nanggagawa hen pafinarat. Anchag ang-anggay ano an nadchi way hin-ina ya achawwéy agé hen iggaw hen tencha-an.
Hen-argawan man, ekat ano Juan an Inanéén,
‘Inggaw-a ahto Ina, ta iyà mamangwit ah wangwang.’ ‘Okaỳ’ way ekat ano eman Inana. Henenot ano Inana hen hangatna. Yachi way inumchah ano ah wangwang yag inlugina ano way mamangwit. Cha ano mamangwifangwit yag angkay manlangranga ad lagud yag innilanat agé hen ihay tagu way cha agé mamangwit. ‘Heno man agé ah naha’ way ekatna ano. ‘Wacha peet ifà henay cha mamangwit.’ Chanaat ano etot-oroy way mamangwit. Yachi ano yag nanhib-atcha. Angkay ano nan-am-ammucha yag ah Pedro ano hen ngachan anchi tagu. Ilanchaat agé hen à-awcha yag nanggawa peet. Anchaat ano ekatén, ‘Ayé ta utmonta hen gudwan antoy binangwitanta ta wachay issata.’ Intomcha eman anochi yag angkay mangancha way fùyatan ano Pedro hen hangatna yag nahaang anoh Juan way nangi-ila. ‘Pakay ta ammag sabsafali hen hangatnowanna?’ way ekat ano Juan. ‘Ammag pokkawan ya kaman paat lanoh chi ma-anana? Ayé kay ta hemhemà a.’ Angkay ano henemhemana yag lanoh way térén. Heno man agé hen cham mangar-an heto? Ay ammag ekat pe-etén hihiyya amin hen cha anén hen tagu yag wacha peet chi nat-én hena ah am-ammay ah ma-an.’ way ekat ano Juan ah hamhamàna. ‘Pakay?’ llanta kay agé hen hangatnowa. Way ekat ano Pedro. Yag cha ano mafiinan ah Juan way mamùyat hen lakkana. Tàen ano yag finùyatana. llan ano Pedro yag appò. Ekatna anowén, ‘Atté yaha angkay hen uppà hen antoy hengngat-o. Yaha hen ekatchéén appò yag yato hen senor-at.’
Yachi way narpascha ano way nangan yag entot-oroycha way namangwit. Fummatangan ano, ah hentàrayanan yag nàchangcha ano chillu ah himfafattay ah gachiw. ‘Ayé ta iyà esokat hen gudwan antoy
finangwità ah fégah ta wachay manemhemanni. Itudtuchum no chuud hen chayu lomàwan ah fégah.’ Intudtuchun eman ano Pedro wat émméy tot-owa i lommao ah Juan.
Hàyahàyat ano yag kaman manginlunug hen anchi fégah. ‘Heno man agé hen nangar-am hena?’ way ekat ano eman Inana. Anat ano haphapetén Juan hen nekamkaman yag laylayad ano ah Inana. Cha-an ano mahen-emad yag nautowat hen senor-atna.
Angkay nauto agé hen enabrawcha way mangancha yag
ekatchéén, ‘Inhangén ang wat ammay ah anén te lanoh ya changraw amin ah anén. Ancha tot-owag enan amin hen senor-atcha hen yachiy lafi. Kaskasen te gachiw agé hen nanichacha. Nanepod ano hen hiyachi, fégafégah ano hen chacha anéanén. Ommamma ano ah Juan ah ufarna wat wacha ay ano hen ubréna ya bangwitana ina kay ano ensokat chi tapena ah fégah.
Yato hen enkaman Juan way nanemhem ah fégah.
