Cha Chagga an Selay
(Tekla Fangonon)
Cha Chagga anon Selay, ininggawcha ad Liyah. Ah Chagga, lummigwat way éméy ad Faliwén way mampa-amma ah aggagarongna. Cha ano manad-aran yag hinib-atna ah Selay. Ekat Selayén, ‘Nokay hen ayam, Chagga?’ ‘Éméyà ad Faliwén ta iyà mampa-amma ah aggagorong-o.’ ‘Aẁ umaleyà’ way ekat ano Selay. Yachig ekat Selayén, ‘Engwata ad Tufuy.’ Ekat Chaggéén, ‘Ad Lumang hen engwata.’ No achim laychén way mangwad Lumang, engwam ad Tubuy ta engwà ad Lumang.’ Anchaat ano manhiyan.
Yachi yag nanhib-atcha ad Faliwén hen nawakas. Ekat ano Gummilayéén, ‘Henon ayanyu, Chagga an Selay?’ Ummale-ani ahto way mampa- ammah aggagorongni.’ No yaha, way ekat Gummilaya, umtot-a Selay un-unna.’ Inumtot anoh Selay yag tég-angay matéy ah Gummilaya yag ammag enagufana amin ad Faliwén. Angkay na-amin hen utot Selay, ekat agé Gummilayéén, ‘Umtot-a Chagga.’ Inumtot anoh Chagga yag am-ammay te chan fangu way térén. ‘Ammay-a Chagga’ way ekat Gummilaya wat omammaà ah aggagorongyu.’ Enammaana hen aggagorong Selay, yag napose. Enammaana hen am-ammay way aggagorong Chagga te chan fangu hen utotna. Anchaat ekatén, ‘Lomayaw-ani.’ Inumchahcha anon charan yag cha chégchéchégchégén Selay ah Chagga te laychéna way eh-atcha hen aggagorongcha. Yag gapo ta achi kommo ah Chagga wat penléh Selay hen anchi aggagorongna way am-ammay. Cha chégchéchégchégén Chagga ah Selay yag achi makachégchég te émméy hen anchi orob way ak-akettoy wat umipat ah Chagga. Angkay nemamang ah Chagga hen anchi hufang hen luwang yag émméy nanlulùfub. Yachi ano yag nanlooh anchi luwang yag nichangleh hen anchi échég Chagga yag napoleg yag nemamang hen anchi orob way émméyan Selay. Angkay yachi yag anat mabrù anchi luwang te natéy. Angkay anchi ma-aporoy ag-agaw way térén way achi mahonghong anchi luwang, fummùnag ah Selay way nansoko. Ekatnéen, ‘Chagga anto hen aggagorongno ta ka-aném annay luwang ta fùnagà.’ Yachi yag innaran Chagga hen anchi aggagorongna yag kena-anna anchi luwang way nabrù. Fummùnag ah Selay yag nanlamanucha. Wat ad uwan, nanggayyémcha. Ommammay hen hamhamà Chagga ya ommammay agé hen hamhamà Selay.
